في ناس كتير بتقول يعني ايه الضربة الساقطة
ويعني ايه زيادة في كهرباء القلب… كتب ذلك استشاري أمراض القلب -جمال شعبان- على صفحته الرسمية على موقع التواصل الاجتماعي فيس بوك.
مجيبًا: مش معني إن في زيادة في كهرباء القلب
ان لو حد لمسك يتكهرب، ولما حد يشتكي ويقول
قلبي هيقف من صدري يا دكتور، روحي بتتسحب مني يا دكتور، باحس بخبطة جامدة في قلبي يا دكتور
معدتي بتقلب عليا وبعدين احس برفة في قلبي، كل دي أعراض الضربة الساقطة.
معلقًا: هي ساقطة مش معناه مش ناجحة
لكن لما البؤرة الكهربية الشاردة ، وللي برا الدايرة الكهربية الطبيعية الربانية ، وبتيجي بدري عن موعدها ، كأنها مبتسرة زي الطفل اللي بيتولد بدري ، بيسموها premature ،الضربة الطبيعية بتسقط، ما بتجيش في موعدها.
واردف في كلامه قائلاً: أن القلب بيعتبر نفسه قام بضربتين بمجهود زيادة فبيرتاح جزء من الثانية، دي الشخص بيحطها سحبة روح أو توقف في التنفس أو كأنه انفصل من الحياة لوهلة .
وأوضح جمال شعبان قائلاً: الضربة الساقطة ممكن تكون من البطين وممكن تكون من الاذين, وأن الضربة الساقطة من البطين هي الأهم وخاصة إذا كان المعدل بتاعها متزايد
بمعنى وصوله الآلاف في اليوم.
ساعات بنحتاج نعمل رسم قلب مستمر ٢٤ ساعة أو ٤٨ ساعة أو حتي أسبوع بجهاز ( الهولتر) علشان نعرف عددها ونسبتها وخاصة لو ما ظهرتش في رسم القلب العادي.
وأكمل : لما تكون النسبة اكتر من ١٠ ٪، مكن تعمل اعتلال في عضلة القلب PVC cardiomyopathy.
ووضح جمال شعبان في تصريحه عن طرق العلاج لحالات الضربة الساقطة قائلاً: بنحتاج نعمل رنين مغناطيسي
علشان نتأكد إذا كنا هنركب جهاز صدمات
والا نعمل عملية كي، والأدوية ممكن تفيد في حالات كتير لكن الكي بموجات الراديو مع الجهاز ثلاثي الأبعاد ممكن تبقي حل نهائي .