كتب الدكتور جمال شعبان ، استشاري أمراض القلب ، لمتابعة عبر صفحته الشخصية فيسبوك ، تفسيرات لمصطلحات الضربة الساقطة و البؤرة الكهربية و كهرباء القلب .
و قال شعبان مفسرا : في ناس كتير بتقول يعني ايه الضربة الساقطة ، ويعني ايه زيادة في كهرباء القلب ؟مش معني إن في زيادة في كهرباء القلب ، ان لو حد لمسك يتكهرب .
مستردفا : لما حد يشتكي ويقول : قلبي هيقف من صدري يا دكتور ، روحي بتتسحب مني يا دكتور ، باحس بخبطة جامدة في قلبي يا دكتور ، معدتي بتقلب عليا وبعدين احس برفة في قلبي ، أن كل دي أعراض الضربة الساقطة .
هي ساقطة مش معناه مش ناجحة ، لكن لما البؤرة الكهربية الشاردة ،اللي برا الدايرة الكهربية الطبيعية الربانية ، بتيجي بدري عن موعدها ، كأنها مبتسرة زي الطفل اللي بيتولد بدري ، و بيسموها premature
الضربة الطبيعية بتسقط ، و ما بتجيش في موعدها .
لأن القلب بيعتبر نفسه قام بضربتين بمجهود
زيادة فبيرتاح جزء من الثانية ، دي الشخص بيحطها سحبة روح ، أو توقف في التنفس ، أو كأنه انفصل من الحياة لوهلة .
و أكمل الدكتور جمال شعبان: الضربة الساقطة ممكن تكون من البطين ، وممكن تكون من الاذين ، وان الضربة الساقطة من البطين هي الأهم وخاصة لو المعدل بتاعها متزايد يعني بالآلاف في اليوم .
و أكمل : واحد يقول لي بالآلاف ، اقول له أيوه، لأن القلب في اليوم بيشتغل ١٠٠ ألف مرة ، غير المتخصصين ممكن يشخصوا حالتك علي أنها حالة نفسية .
كما أوضح شعبان قائلاً : ساعات بنحتاج نعمل رسم قلب مستمر ٢٤ ساعة أو ٤٨ ساعة أو حتي أسبوع ، بجهاز ( الهولتر)، علشان نعرف عددها ونسبتها، وخاصة لو ما ظهرتش في رسم القلب العادي.
و أردف : لما تكون النسبة اكتر من ١٠ ٪ ، ممكن تعمل اعتلال في عضلة القلب PVC cardiomyopathy، و ساعات بنحتاج نعمل رنين مغناطيسي علشان نتأكد إذا كنا هنركب جهاز صدمات والا نعمل عملية كي .
و أن الأدوية ممكن تفيد في حالات كتير ، لكن الكي بموجات الراديو مع الجهاز ثلاثي الأبعاد ممكن تبقي حل نهائي شافٍ باذن الله.