كتب : يسرا السيوفي
تلوين البيض من أجمل طقوس شم النسيم اللي بتفرح الأطفال وبتخلق جو من البهجة في البيت، لكن الأهم إننا نعمل ده بطريقة آمنة وصحية علشان نحافظ على صحة ولادنا ونبعد عن أي مواد كيميائية ممكن تكون ضارة.
في المقال ده هتعرفي خطوات تلوين البيض بألوان طبيعية 100% من مطبخك، وأفكار بسيطة تخلي البيض شكله تحفة من غير أي ضرر.
ليه نستخدم ألوان طبيعية؟
البيض الملون بيتاكل، وبالتالي لازم الألوان المستخدمة تكون غير سامة، ويفضل تكون طبيعية خالية من المواد الحافظة أو الصناعية، ودي كمان فرصة نعلم فيها أولادنا ازاي نستغل الحاجات اللي في البيت بطريقة مفيدة وممتعة.
أمثلة لألوان طبيعية لتلوين البيض
أحمر/وردي: استخدمي عصير البنجر أو قشر البصل الأحمر.
أزرق: الكرنب الأحمر مع شوية بيكربونات صوديوم.
أصفر: الكركم أو قشر الليمون.
برتقالي: قشر البصل البني أو الجزر المبشور.
أخضر: السبانخ المغلية أو البقدونس.
الطريقة خطوة بخطوة
1. اسلقي البيض جيدًا لمدة 10-12 دقيقة، وبعدها حطيه في ماء بارد علشان يتقشر بسهولة.
2. في كل حلة صغيرة، حطي كوب ماء + ملعقة خل أبيض + المادة الطبيعية اللي هتستخدميها (زي البنجر أو الكركم).
3. اغلي الخليط على النار حوالي 10 دقائق، وسيبيه يبرد.
4. حطي البيض المسلوق في كل لون، وسيبيه من ساعة لحد 3 ساعات حسب درجة اللون اللي عايزاها.
5. طلّعي البيض وسيبيه ينشف على ورق مطبخ، ولو حابة تديله لمعة امسحيه بزيت بسيط بعد ما ينشف.
نصائح مهمة:
دايمًا استخدمي بيض أبيض علشان الألوان تبان أوضح.
خلي الأطفال يشاركوا معاك في التلوين، لكن تحت إشرافك.
اكتبي على كل بيضة اسم اللون الطبيعي اللي استخدمتيه، كأنها تجربة علمية بسيطة وممتعة.
